నమో నమః
పై ఫోటో లో ఉన్నది శ్రీ గోవిందరాజన్ అయ్యర్ గారు , వారి సతీమణి. శ్రీ గోవిందరాజన్ గారు కిందటి సంవత్సరమే నూరవ పుట్టిన రోజు జరుపుకున్నారు . వారి సతీ మణికి ఇప్పుడు తొంభై సంవత్సరాలు.
' మంత్ర ద్రష్ట ' పుస్తకపు మూలమైన కన్నడ భాషలోని ' మహా బ్రాహ్మణ ' పుస్తకము రాసిన శ్రీ దేవుడు నరసింహశాస్త్రి గారు , శ్రీ గోవింద రాజన్ గారికి గురువు గారు . 1925-1935 మధ్య వీరు , వారిదగ్గర శిష్యుడు గా ఉన్నారు .
శ్రీ గోవిందరాజన్ గారు కూడా ఉపాధ్యయులే . వీరిని గురించి తెలియని వారు ఒకప్పుడు బెంగుళూరిలోనే కాక , కర్నాటకలో కూడా ఎవరూ ఉండేవారు కాదు .
వీరిద్దరూ ఇప్పటికీ ఎంతో ఆరోగ్యంగా , తమ పనులు తామే చేసుకుంటూ ఆది దంపతుల వలె నిండుగా ఉంటారు. శ్రీ గోవింద రాజన్ గారు ఇప్పటికీ రుద్రము , అరుణము మహా న్యాసము వంటివి కుమారునితో పాటూ పారాయణ చేస్తారు . రోజూ పొద్దున్నే నిత్య కర్మల తర్వాత కొడుకు ఇచ్చే అభిషేకపు తీర్థము తీసుకుని గానీ వీరి దిన చర్య ( వార్తా పత్రికా పఠనము , టీ వీ వీక్షణము , మొ ॥ ) మొదలు కాదు .
ఈమధ్య వీరితో మాట్లాడాను . మా వూరి తో ( అనంతపురము ) వారికున్న అనుబంధము గురించి చెప్పారు .
ఇంకా చెప్పుటకు చాలా ఉందికాని , గ్రంధ విస్తరణ భీతి చే ఇక్కడికి నిలుపుతాను .
శ్రీ దేవుడు గారు చాలా నిరాడంబర వ్యక్తి అని , అతి నిష్ఠా గరిష్ఠులనీ శ్రీ గోవిందరాజన్ గారు చెపుతారు . వీరు తెలుగు , కన్నడ , తమిళ్ , ఇంగ్లీషు భాషలు అనర్గళముగా మాట్లాడతారు . వారి సతీమణి కేరళ నుండీ వచ్చిన అయ్యరు కుటుంబీకులు .
వీరి ఆఖరి పుత్రుడు శ్రీ అశోక్ అయ్యర్ గారు నాకు మంచి మిత్రులే కాక, వేదాధ్యయనములో నాకు సహపాఠి. మా ఇద్దరి అధ్యయనము ఇంకా సాగుతున్నది . మా గురువు గారు పూజ్య శ్రీ ప్రకాశ భట్టు గారు . నాకు ' మహా బ్రాహ్మణ ' పుస్తకము దొరికినది వీరి వల్లనే .
No comments:
Post a Comment